近日大市氣氛相當差，但仍有股仔異動，好似轉型搞大陸房地產的中新集團（563），近期股價相當波動。經紀陳話，隻股將在下周二公布中期業績，江湖傳聞業績靚仔，股價異動，唔排除係有春江鴨買貨之故。
中新昨日最高見0.39元，收0.37元，大升15.63％，成交股數339萬股，金額121萬元。
中新舊時叫做科建，本來做開科網，股權曾易手多次，家陣則經營大陸房地產。中新去年年中，因出售一項物業權益，所有錄得一筆頗為可觀的特殊盈利，如無意外，呢筆數應該會在今次業績中反映。隻股街貨唔多，要借消息炒上，應該唔會有難度。
另外，經紀陳早排曾提過中國星（326）同埋阿仔豐采多媒體（764），中國星喺早排澳門賭業股當旺時炒過一輪，但暫時重係冇濠江消息跟尾，至於豐采，將在下周搞1拆10，聽講會有後着。豐采噚日突然急升12.12％，收3.70元，但成交就好細，只得89.6萬股，金額308萬元。
慕容小初