噚日係農曆十二月初一，又到還神月份。八方年年年頭都去車公廟祈福，年尾就去還神，同一位高官傾起，佢都話要去求番支籤，特別係林煥光辭職之後。
煥光深夜唔撈，繼續成為官場討論焦點。除咗緋聞同動機，又講到玄學。班高官話佢哋一諗起猴年劉皇發在車公廟幫特區求嗰支中籤，就覺得好神奇，再諗埋前年何志平支下下籤，更加要去拜一拜。
發叔求得嘅係七十六籤，籤文謂「人情反覆似波濤，勿謂金蘭結義高，上古守明今重利、囊空不見舊同袍」。當時《蘋果》搵麥玲玲居士解，佢話支籤預示「政黨或官場有人事變動，是非重多爭拗，一切以利益及經濟為先」（見○四年一月二十四日報道）。睇吓楊永強，睇吓林煥光，再睇吓官場政界近況，嘩，真係好靈啫。
傳真︰2623-9278
電郵︰