林煥光因與女大律師布穎琪在聖誕假期同遊東京，俾《忽然１周》影到相，竟然因此而辭職，唔再做特首辦公室主任，實在有啲奇怪。林煥光與布大律師來往，早已不是秘聞，政界人人皆知，新聞界亦一早瞭然於胸，照計冇乜傷害性，唔通因為林煥光對老婆講話去北京，實質就一個屈尾十走咗去東京，故此問心有愧？
成班中環老友熱烈討論此事，大家都係男人，意見可能有偏差，女士或有不同想法。賓架Ｗ首先話：「大家有無紅顏知己？」咁嘅問題，點答呀？有又點，冇又點？賓架Ｗ笑笑口話：「有紅顏知己嘅話，第一件事就係要研究任志剛總裁單case，點解任總裁啲本領咁高強，有婚外情而可以順利拆彈，與太太搞掂離婚，與紅顏知己結成連理，完全避免晒狗仔隊及八卦周刊搞事，安全抵壘。」嚡，任總裁零零啥啥叻人一等，點學呀？學唔到，唔通學林煥光？辭職唔撈喎，以後生活點辦呀？
賓架Ｗ話：「學唔到任生，就要鼓其如簧之舌，叫老婆忍忍忍，否則我冇得撈，你嘅生活都冇咁好過㗎，算我認錯，冇發生過啦，老婆大人你千祈唔好亮相，唔好見記者呀！」呢招未必有效噃，現代女性好少會啞忍，忍忍忍到你有四五個女人嘅啫，八九十歲嘅上一代就唔同。
講來講去，冇乜好橋，最好請任總開班，私底下講解畀啲賓架聽。太太唔肯離婚，自己搬出去與女友同居，最後有何結果。冇仔女，情況冇咁複雜，三個成年人去解決一個成年人嘅感情問題，卒之都會有方法嘅，時間問題啫！