馬小九事件，繼續撲朔迷離！繼中聯辦肥高表態話歡迎老朋友馬小九來港之後，又輪到保安局局長李少光自動引爆話從來冇拒絕過馬小九嘅入境簽證！
咁即是點？係嚟定唔嚟得？唔係馬小九想嚟香港，而係「民間」邀請佢，若然唔嚟得，咁點解「民間」又要邀請佢？尤其係當呢個「民間」，唔係支聯會，又唔係黑社會，唔係長毛，亦唔係劉慧卿，而係有頭有面嘅香港大學，重有，一向愛國愛黨、同中央人民政府有特別天地線嘅「百人會」創辦人陳啟宗！
朗尼．陳一向係中央人民政府在港認可喉舌之一，大罵民主黨，痛鏟李柱銘，由朗尼．陳嘅「百人會」邀請馬小九來特區，嘩，重同美國啲市長平起平坐，有鬼佬貴賓襯托，擺明係同馬小九競選台灣總統，跟住再做首任台灣特首增威添勢，點解突然之間反面？
到咗摑完一巴嘞，又輪到吳康民解畫，話唔畀馬小九來港係保護佢，希望佢唔好被定性為裏通外國、親中賣台，等佢下屆做到總統，跟住開城門迎接解放軍！
搞到資訊錯亂，盞紅綠燈眨紅閃綠，燒晒電線，所以李少光飛身又補飛話冇Say過No！可憐馬小九左質一啖屎，右塞一匙沙糖，侮辱完又再侮辱，沒完沒了！嚟香港係受到親中商人造勢追捧，唔准入境咩，又變咗受保護喎，嚟又唔啱，唔嚟又係錯，即是點選總統都死！
另外嗰邊，春節台商包機，又斟成咗，從此台中雙方，直航有望，呢一樣，全港市民，不分黨派，就要示威遊行嘞！
點解？因為香港一向係中間人，台灣佬過港北上中國，喺香港濕一濕腳，旅遊飲食，百業暢旺！好似買樓咁，買賣雙方直接交易，飛起中原美聯啲經紀，你話重成世界？
香港係一個經濟城市，唔講政治，中台統一，關人Q事，總之香港冇飯食就唔得！強烈譴責中扁勾結賣港，飛起中間人，民建聯、老董、維園阿伯、長毛、李卓人，無分彼此，都應一致反對！
點樣可以整禍中台直接交易？睇呂秀蓮嘞！只要蓮姑講兩句「台灣已事實獨立」，搞到中國再次軍演，咁包機直航咪玩完囉！呂秀蓮，幫吓香港人生計喇，睇你嘞！
傳真︰2623-9278
電郵︰