林煥光是不是一定要請辭呢？
不一定，只要他的頂頭老細出面保他就行。
點保法？唔，可以係：
認頭。表示馬仔只係替他做掩護，真相大白，那個紅顏知己，其實是他的女友。
無厘頭。指馬仔去東京的確係公幹，這是做董班子核心的福利特權之一，其他人吹鬚睩眼，一於好少理。
即場向記者高歌愛心無國界主題曲《愛》：「分擔責任，同情共慰問，正因我亦是人……」澄清其實下屬是去賑災。咦，乜東京有地震咩？去年冇，今年遭印尼九級大地震波及，話唔埋嘛。
不管記者信不信，照樣風趣地認為，狗仔隊影到那個，並不是林煥光而係他的孖生兄弟。
轉移視線，激氣地指出，整件事，是有人在背後搞事，破壞香港中產家庭的安定繁榮。林煥光因緋聞離職，甚至會跟老婆分居，到時肯定要另外搵竇，事件最大的得益者，必然係肥到着唔到襪的地產商和貨尾等住清倉的地產公司。
換光唔換暗，知道自己夠晒黑仔的董先生，篤信風水面相姓名學，沒理由棄明投暗，點都會撐林煥光。點撐至好？在這個關頭，惟有叫他將那段已經見光死的姻緣，轉做地下情。再唔得，就要勸佢：煥光呵，換馬我好難做，你換畫好啲呵。