個市波濤仍然唔細，恒指曾散過139點，埋單唔見43點。濠賭股如果定得番，人心有望好番啲，恒指唔使再試更低水平。
恒指C輪3505：博個市反彈，揀恒指C輪短炒，可向3505埋手。同類輪中呢件交投金額第2大，超過1億銀，5月尾夠鐘，輪價13.4仙，溢價4.8%，槓桿率23.5倍（有效11.2倍），引伸波幅20.1%。有4個幾月壽命，唔怕溢價大收縮。
唔想波幅咁大，可以揀3700，呢件成交金額重大過3505，6月底到期，輪價19.7仙，溢價4.1%，槓桿率15.3倍（有效8.7倍），引伸波幅21.7%。
滙控C輪4441：恒指跌43點，完全係滙控（005）所扯低。滙控收128元，跌1.50元，恒指因此而唔見53.8點。
大市如果定番，滙控亦有機會造好啲。滙控搶唔到韓國第一銀行，冇乜大不了，當作乜都冇發生過。渣打（2888）收購第一銀行成事機會較大，做「披成」，本港停牌，倫敦市昨晚開出先跌4%。
博滙控反彈，買滙控C輪4441，6月尾夠鐘，輪價57仙，溢價1.2%，槓桿率22.5倍（有效13.1倍），引伸波幅14.0%。𠵱家個價，已經返到去舊年11月初水平。
中銀C輪9169：中銀（2388）開市幾分鐘跌到14.30元，埋單硬淨，平收14.50元。低位有積極買盤，收番啲C輪係時候，正路之選係9169，輪價21仙，負溢價0.1%，槓桿率6.9倍（有效6.2倍）。雖然下月尾到期，壽命短啲，但已負溢價，唔怕輸「縮水」。
章盛