眾日本國腳喺歐洲球壇沉寂咗一段日子，無晒人氣，所以日前借到去西班牙馬略卡嘅大久保嘉人首次上陣即入波，打破咗近一、兩年悶局。
大久保嘉人日前對拉科魯尼亞處子登場，即時有一個助攻同一個入球，協助馬略卡主場打和二比二，力保不敗，打破日本球員好似西澤明訓、城彰二等喺西甲一無是處宿命。馬略卡教練古柏賽後對佢刮目相看，佢解釋雖然大久保目前比賽狀態平平，但喺首場比賽竟然有咁嘅表現，已經係預期之外咁好，亦不枉一大班日本記者喺呢個小島貼身追蹤。
我求大俠記得以往日本國腳喺歐洲球壇處子登場，就只有中田英壽對祖雲達斯時即刻省入兩粒引起廣泛注意，睇吓呢位身形矮、速度高嘅前鋒，可唔可以突圍成功啦？
西班牙球迷認真唔生性，喺上次西班牙對英格蘭嘅友賽中，由於用帶種族歧視語言謾罵對方球員，引起極大嘅反應。而喺周日嘅馬德里打吡戰上，馬體會球迷又作出類似行為，今次嘅受害者係皇馬嘅卡路士。如果馬德里球迷重係咁樣嘅話，該市要成功申辦二○一二年奧運都幾難。
人不風流枉少年，但係點樣喺事業同愛情間取得平衡，就講究「功力」啦！就好似國米嘅阿祖安奴同韋利咁，前者最近掛住陪羅馬尼亞靚MODEL而表現大跌WATT；喺女人堆長大嘅韋利就唔同，自從聖誕同新女友同遊加拿大後，最近兩場都有入波。睇嚟阿祖要向前輩取吓經啦。
我哋報道過英國《太陽報》搞噱頭，只要葉汀龍門派迪對紐卡素能唔失球，就送上靚車一部。結果葉汀吞兩蛋，不過《太陽報》見派迪表現唔錯，發出相等於佢一百個禮拜人工嘅六千鎊獎金，重畀佢免費揸靚車三個月，兼送歐冠盃決賽貴賓飛。隊波輸咗，但派迪總算成「贏家」。
里昂嘅巴西前鋒艾巴季初養傷到𠵱家，都咪話唔運滯，由於佢嘅足踝傷未必可趕及轉會市場關閉前好番，所以里昂唔等佢，用咗艾巴個非歐盟名額簽咗個巴西後生仔尼爾馬，而艾巴就算好番都要踢里昂嘅丁組代表隊。話晒艾巴當年都係拜仁射手，家陣受到咁嘅待遇，真悲哀。