南亞地震及海嘯災難發生至今已經十六日，十幾萬人眨吓眼就俾呢場世紀浩劫奪去性命，數以百萬計災民家園盡毀。呢場天災災情之嚴重固然係一個紀錄，不過令人鼓舞嘅係，本港各界籌款數字爆晒燈，除咗市民之外，商界喺今次賑災活動之中亦出錢出力。
好多商戶知道蘋果日報慈善基金成立「亞洲地震及海嘯救災基金」，紛紛響應支持，好似早幾日BravoLatata餐廳就搞咗兩場慈善自助餐；名古屋麵包西餅有限公司喺早前嘅工展會展銷攤位舉辦慈善義賣日；影星周星馳聯同哥倫比亞電影公司同埋二十二間戲院，喺上星期四舉行電影「功夫」嘅慈善義映，全部收益撥捐蘋果基金支援救災。
必勝客（PizzaHut）亦喺全港五十間分店放置蘋果基金提供嘅捐款箱，收集善款，直至本月十五日為止，大家記得去附近一間Pizza，捐錢做善事。
蘋果基金已將首批三百萬元善款交畀香港紅十字會，作緊急救災用途，主要用嚟購買衞生用品、食物、清潔食水、藥物等救援物資；稍後將會把籌集所得善款，用作協助災區重建。
「亞洲地震及海嘯救災基金」
捐款編號：C1600
暖流熱線
電話：29908688
傳真：23702192
電郵：
網址：