上周港股跌到扁晒，P輪大領風騷，𠵱家追P輪，可能已經遲咗，風險大增。小注候低位買C輪，可以諗吓。快趣到期嘅C輪，槓桿率高嗰批，波幅極大，入市做嘢，記緊注碼咪太大。以前某一波幅要用一個星期先至完成，𠵱家或者半個交易日就搞掂。
中移動C輪2169：網通（906）因為PE喺同類股中最低，大行紛紛推介，上禮拜表現，冇隻熱門股夠佢勁，對電訊股或有帶動作用。中移動（941）再跌嘅話，就可以搵啲相關C輪短炒博吓反彈。
4476係最熱門嘅中移動C輪，3月中到期，輪價11.3仙，溢價4.6%，槓桿率21.2倍（有效11.2倍），引伸波幅27.3%。溢價唔細，但正股波動急劇，隻輪移動之時，好驚人，例如上周五最低8仙，到收市已經彈番41%。
穩陣啲，唔想輪價有咁大刺激，揀長期C輪2169，8月初夠鐘，輪價15.1仙，溢價10%，槓桿率15.9倍（有效7.4倍），引伸波幅26.3%。
中電信C輪4499：中電信（728）若見更低位，博反彈，炒C輪，短期嘅揀4547，呢隻叫做有番多啲成交。4547喺4月中夠鐘，輪價16.1仙，溢價8%，槓桿率16.5倍（有效7.6倍），引伸波幅37.4%。
唔嫌交投疏落，揀4499，6月到期，輪價35.5仙，溢價3.2%，槓桿率7.5倍（有效5.2倍），引伸波幅33.1%。
聯通C輪：聯通C輪交投唔多，普遍溢價極高，買唔落手，博電訊股反彈買輪，揀中移動同中電信C輪好啲。
章盛