李彩華（Rain）、黃宗澤、陳鍵鋒、姜大偉和楊婉儀等，噚日喺青衣城宣傳無綫新劇《我師傅係黃飛鴻》，重邀請咗個註冊中醫師示範正確嘅跌打治療法，不過阿Rain、黃宗澤同陳鍵鋒三個就企喺後排玩到嘈喧巴閉，完全無心向學。
阿Rain見到黃宗澤嗰條充滿汗水嘅辮甩吓甩吓，竟然擺喺自己個口度扮鬍鬚，又用繃帶紮到黃宗澤成個木乃伊咁，兩個人綁嚟綁去，又綁埋一齊，之後陳鍵鋒重玩埋一份，同阿Rain及黃宗澤猜包剪揼，猜輸嗰個要俾人搽藥酒。
問阿Rain同兩個男仔玩得咁埋，驚唔驚傳緋聞？佢話：「嘩！計埋以前嗰啲十角戀㖭，呢套劇又冇緋聞又冇是非，我都有啲唔慣。」問佢今次會揀邊個同佢傳緋聞？阿Rain話未試過一腳踏兩船，況且兩個都有唔同味道，好難揀，阿Rain話：「黃宗澤有汗味，陳鍵鋒就有藥酒味。」
不過黃宗澤同陳鍵鋒聽見傳緋聞，重驚青過阿Rain，黃宗澤重話係阿Rain扯佢條辮，唔關佢事，陳鍵鋒就話：「等佢冇男友先啦！」
韓國靚仔元斌今日會喺台灣宣傳電影《來不及對你說》，上年裴勇俊去台灣宣傳《挑情寶鑑》，有成千fans接機，元斌啲歌迷梗係唔想輸畀俊哥啦，但今日又唔係假期，當地嘅學生又要考試，台灣「Wonderland」元斌影友會緊急聯絡日本同香港嘅歌迷撐場接機，影友會重準備咗「迎斌專車」接載歌迷。元斌將會入住六福皇宮飯店嘅總統套房，據知房租每晚要成萬五蚊港紙。
王家衞原定三月開拍由金像影后妮歌潔曼（NicoleKidman）主演嘅西片《來自上海的女人》，但因為籌備時間唔夠，加上大忙人妮歌潔曼冇期，所以決定押後到七月先開拍。
馮仁昭知道王家衞好緊張套片，呢排周圍飛去外地睇景，片商希望部戲可以喺出年上映。
石修組嘅Shekies樂隊，噚日喺西環「第八屆中西區區節閉幕典禮」獻唱，石修話其他成員都有正職，為興趣而夾band，遲啲佢哋會去上海唱兩場騷，因為隊band未有自己創作嘅歌，所以暫時都要唱人哋啲歌，fans要聽佢哋嘅作品就要等多陣！
台灣中視開拍嘅電視劇《白色巨塔》人選遲遲未定，有傳蘇有朋開價每集一萬蚊美金（約七萬八千港元）嚇走人，之後佢降價至四萬幾港幣一集先接得成。《白》劇總企劃敖君怡回應話從來冇放棄過蘇有朋，雙方已經傾得七七八八，蘇有朋會做男主角，但最終決定權當然喺中視高層手中啦！
