大內總管林煥光自稱因私隱俾傳媒曝光，反炒阿董魷魚，成為周末至Hit話題！儍嘅先會信內情就係咁簡單。某公信力娛樂周刊直頭講明佢係被迫走，因為長期不獲阿董信任，慘遭阿董身邊嘅老左架空，同女大狀出入，又被廢董指為私德有問題，今次再犯，梗係要遞信！
乜廢董咁重視高官嘅私德咩？咁財政司司長梁錦松，因避稅買車袋多咗五萬，同林光光相比，一個貪財，一個過唔到色字嗰關，點解漏稅貪財嗰個，反而獲得廢董高度讚揚係「高尚情操」，一再挽留，而林光光揀女嘅品味咁精緻，廢董就覺得佢私德低下？
董班子平時乜都慢三拍，連布吉救港人都咁癡呆，批准光光「辭職」，說時遲那時快，重閃速過一隻蠄蟝「霎」一聲勁彈條脷出嚟嗒咗隻飛蚊，點有可能咁轉死性？
重有一樣最犯駁嘅劇情，就係林光光話，因私隱被傳媒曝光，所以辭職，咁樣係好唔負責任啫！廢董講過，要儒家治港，儒家思想要求，犧牲小我，成全大我，家國大事幾時都大過兒女私情，特首辦主任繫天下安危，光光為咗紅顏，咁就飛咗阿董，重因為咁俾好多電台女主持人及時評人讚佢好嘢，喺青少年面前，又樹立咗乜嘢典範？
若然有一對男女中學生，讀緊F5，秘密拍拖，點知俾同學見到，喺課室壁報板登咗出嚟，咁呢對男女生可唔可以話，因私隱被曝光，決定退學唔再讀書，唔再會考？羅范椒芬若然唔出嚟就事件作出指引性嘅評論，容乜易放完農曆新年假全港中學冇咗一半人復課上堂？
重有律師溝女被踢爆，從此執咗間律師行，醫生同個女護士去日本度假曝光，又執咗間診所，從此唔行醫，好騎呢啫係咪？
當年梁銘彥無故被炒，立法局都閉門聆訊，事後重話好「震驚」㖭。今次光光事件，立法會係咪應該查考吓有乜不足呢？若然係涉及政治問題，有乜難言之隱，唔怕喎光光，郎才女貌，市民咁受落，香港人實撐你喎！
傳真︰2623-9278
電郵︰