市場不時聽到創新高，但間中都有業主肯平賣，太子別樹華軒就有一件，中層G，三百六十呎，作價百四萬，每呎三千八。利記馮樹勳話，折讓五巴仙。
舊年有四百幾宗登記嘅長沙灣泓景臺，原來一樣有平貨。利記曾建業話，七座極高層C，九百八十呎，以四百萬沽出，每呎四千一，低同類七巴仙。
不過，講到幅度，點都唔夠屯門居屋銀主盤勁，祥益邱家邦話，兆麟苑一座中層五室銀主盤，喺自由市場以八十六萬成交，七百一十呎，每呎千二，比市價低一成三。睇嚟想用一百幾十萬上車，要新界居屋至有多啲選擇，銀主盤就重抵。
邱家邦話，呢個月屯門居屋銀主成交，主要係龍門居，有啲呎價唔使一千，八座低層D，逾六百九十呎，作價近六十九萬，只係九百九十蚊一呎。
舊年樓市暢旺，樓價急漲，製造好多轉手獲利機會，唔少重係屬於摸貨。一年可以轉幾次嘅成交唔算太多，主要係樓花或新入伙屋苑，但又一村康豪苑呢個冷門物業，估唔到都可以一年三度易主，不過，兩手業主就「同人唔同命」嘞。
中記余社朝話，單位係排屋，舊年三月成交價千八萬，到十一月以一千七百八十萬賣出，蝕咗二十萬。估唔到間屋近日畀個醫生睇中，以二千一百萬買入，賣方三個月賺三百二十萬，即一成八。
間排屋二千三百七十呎，有逾千呎花園同埋車位。
蘭西最近前往濠江一行，見到議事亭附近一個地舖，擺放樓盤模型（圖二），十足十本港發展商賣樓咁款，但原來呢個舖位，本身係一間貿易公司，只不過兼營樓宇買賣，先至出現呢個咁奇特嘅情況。
樓市翻生，差唔多到「雞犬皆升」地步，搞到持貨多年嘅業主，都心郁郁，興起沽貨獲利念頭，火炭金豪工業大廈，三千五百五十呎地廠，業主揸住單位收租二十幾年，最近都忍唔住買家利誘，終於以八百三十萬賣出單位。
呢個地廠，一共分間為六個舖位，租畀文具店、印務公司以及快餐店等。
以最新成交價計，買家有六厘回報，算唔算吸引，就見仁見智。
新地上水皇府山近排落力軟銷，圍繞提供貴族生活。噚日隆重其事，喺香港賽馬會雙魚河騎術學校，舉辦「皇府山駿馬園遊會」，連環推介兩項活動，既有騎術訓練課程，又與廣東飛靶訓練基地合作，代住客安排飛靶射擊訓練課程。新地重請嚟九二年奧運金牌得主張山示範。
新地周國賢話，皇府山對出有幅農地，會擺放雷射靶訓練機，畀住戶試吓飛靶射擊，有興趣再安排課程。佢自己噚日一展身手，不過，由於陽光太猛而瞄唔準，玩咗一輪都冇射中。
電郵地址：
