上周五濠賭股急跌，嚇親唔少人，但個別濠賭股在臨收市前反彈，市場上有個講法，話係幕後趁散戶被斬倉後，在低位收集，濠賭股未玩完，稍後會再升過。
上周五公布收購澳門金龍酒店4成權益的東方明珠（600），幕後全日力頂，股價最高升過1倍，高見1.69元，雖然回落至1.27元收市，計落仍升54.88％。收市後市場傳出，東方明珠按每股1元，配售2.6億股，集資2.6億元，小初恍然大悟點解有人要頂得咁行。
另一隻上周五復牌勁升的股票，就係上海策略置地（164），公司以每股3仙配售5.3億股，同埋向不少於6名投資者配售3120萬港元可換股票據，以及向基金投資者配售7800萬港元保證可換股票據，合共集資1.225億元。
上海策略置地亦係話去濠江，但就只係投資地產，冇話沾手賭業。上周五復牌勁升93％，收8.1仙。經紀陳話，如果大家有留意，其實隻股與邁特科技（1031）同出一系，尤其係買入票據的對沖基金，坐落唔少邁特股份，賺咗大錢，所以上置要留意。
慕容小初