過氣流行天王米高積遜（MichaelJackson），近年經常俾外界攞嚟做笑柄，除咗早前Eminem喺《JustLoseIt》嘅ＭＶ模仿米高之外，聽晚喺明珠台啟播嘅人氣電視劇《凹/凸容醫》，亦諷刺米高整容整得過多。
呢套劇喺美國好受歡迎，已入圍金球獎「最佳連續劇」同「最佳連續劇男、女主角」提名。故事以兩位整容美容男醫生為主角，帶出佢哋唔同嘅人生觀同處事方式影響下嘅遭遇。茱利亞羅拔絲（JuliaRoberts）前男友戴倫華許（DylanWalsh）演嘅主角Sean，正直善良，但唔擅處理妻兒關係；澳洲前首相威廉麥馬洪（WilliamMcMahon）之子朱利安（Julian）演花弗醫生Christian，成日同女客人鬼混。
喺其中一集《凹/凸容醫》內就出現一個同米高積遜好似樣嘅人，呢個自稱米高fans嘅A貨米高，話自己只係整過兩次容，佢重想搵劇中嘅整容醫生Christian再整容，但Christian認為佢同米高一樣整咗五次容，再整就唔使呼吸，乘機諷刺米高整容次數太多，連Christian都拒絕為佢再整。
此外，劇中兩位男主角都有唔少露臀床戲，露兩點美女亦唔少，做手術嘅血腥畫面亦頻頻出現。而有份演出嘅靚女KellyCarlson早前接受越洋視像訪問時話：「我雖然冇整過容，但亦唔覺得整容有乜問題。」