外圍股市轉弱，港股上周走勢亦急轉直下，連跌4日，且成交大增（上周五且去到325億元），多個重要支持位都跌穿，恒指最低跌到13403，收市13574，全周計數，共下跌655點，短期大市弱勢持續，雖有反彈，亦會繼續尋底，恒指初步要去到雙頂量度跌幅目標的13180才會有較大支持。
澳門概念股炒呀炒，終於在上周五出現第一次小股災，炒了成季，出現一次較大幅度嘅調整，真係好正常，雖然個別回落嘅幅度有成40至50%，但同以倍計嘅升幅比較，仍算合理，冷卻一下，「濠」股後市發展會更為健康。
05年港股大勢向好，今次調整完成後，下一個升浪，恒指好大機會衝上15500至16000點。至於「濠」股，仍然係投機炒賣的主流，每一次大幅調整，都會汰弱留強，亦係低吸實力股的大好機會，後市重會有好多個升浪，亦肯定重會有以倍計升幅的股份出現。
上周五復牌嘅上海策略置地（164），一聲染「濠」，股價即時彈升，最高13仙，其後雖跟大市走軟，但收8.1仙，仍比停牌前的4.2仙，大升92.8%。上置個勢咁勁，主要係行內人士已有共識，就係上置將係繼新濠（200）、邁特科技（1031）同奧瑪仕（959）等之後，「濠」股的另一粒明日之星。
第一，上置今次發售新股同可換股票據，共集資逾1.2億元，接貨嘅Stark基金，來頭甚大，所管理的資金總值，高達57億美元，若行使換股權，將持有上置32.4%的股份，成為最大股東，須提出全購。
第二，Stark亦有入股邁特，家吓股價已上升數倍，今次入股上置，聽聞信心更大，並唔排除會在市場增持。上周五，有大行在午後一直接貨，收市前在8仙水平更大手掛入10多球，基金在現水平重大手求貨，唔會冇料到。
第三，上置上周五嘅市前交易，對價13仙，成咗逾億股，只有有心人，先會扯高兩倍嚟食貨，13仙呢個價，可以作為初步嘅上升目標，至於行內點睇，有消息話會見2字頭。講多一句，「濠」股風險大，要揸緊止賺同止蝕嘅原則。
郭兆誠