最近在幾個籃球網站，不約而同看到球迷為自己擁護的偶像展開罵戰。睇波，除了想看自己支持的球隊贏波、喜歡的球星打得好；和敵對球迷罵戰，有時甚至比球賽本身帶來更多樂趣。
由小時候和擁護愉園的弟弟爭論陳發枝定梁帥榮好波；到大一點聯同班上的佐敦迷，與活塞fans爭拗佢哋隊波茅唔茅；甚至上年在酒吧和一大班反碧咸躉，目睹「萬人迷」在歐國盃對葡萄牙「一飛沖天」時，喺眾多英格蘭球迷面前高叫好波。由細到大，相信香港不少男孩子和我一樣，經歷過和敵隊球迷對罵的過癮歲月。
迷上球星，固然因為其球技，更可能是源於他們真情流露的一刻，尤其在今日球星如明星，愈來愈假的年代。喜怒哀樂、會寸、會講粗口、吐口水甚至發脾氣打人，都可以是叫你着迷的原因。朗拿甸奴不算靚仔，但他在歐冠為巴塞對AC米蘭反先二比一時，脫去上衣在鏡頭面前怒吼；那一刻，不少人都會覺得他比碧咸更有型吧！
人人都有自己杯茶，簡東拿反起衫領踢波，有人話佢不可一世，亦有人覺得這樣才表達到法國人的高傲；我欣賞鄧肯樸實無華，亦有人話佢木獨，球星風範欠奉。就算阿達斯打球迷咁過份、佐敦又好波又有品，都難以讓全世界肯定或否定。總之一句講晒，球星好波又夠率性，就一定有球迷支持。
你之蜜糖，我的砒霜；談及自己擁護的，少不免要和意見相左的「拗一餐」。就如阿仙奴迷永遠看不順眼紅魔、奧尼爾fans討厭拜恩一樣。說到尾，只要真心支持愛隊或球星，唔好因鬧而鬧、人身攻擊；又或淪為強隊奴隸，只識踩弱隊球迷。罵戰，其實都幾賞心樂事㗎！
仙道彬
電郵：