民主黨元老司徒華月初寫過篇論文，指出外交部特派專員楊文昌唔識寫詩夾硬嚟，寫出嚟嘅「詩」除咗句數字數，平仄全部搞錯晒。楊文昌噚日唔忿氣，就喺《明報》寫番篇文撑自己識寫詩，話華叔「擺出一副中國古詩教師爺的架式」，「惡意挑剔」佢嘅詩，又引埋李白、杜甫嘅作品為證，重叫華叔「人老了，退休了」，應該安享晚年，唔應該成日谷氣、睇乜都唔順超。
八方噚日搵華叔回應，佢話楊文昌唔講重好，一講反而自暴其短，因為顯示咗佢唔止態度惡劣，重乜都唔識。做咗幾十年教師嘅華叔話，自己對錯別字、音韻平仄出錯，特別敏感，準備遲啲寫番篇文再反擊楊文昌，重會登番以前教小學生認識平仄嘅舊文。
至於楊文昌話佢老咗就睇乜都唔順超，華叔反駁，當年毛澤東發動文革時都係七十三歲，如果楊文昌當時敢講呢句話，已經犯咗現行反革命罪。
（圖）華叔懶理是非，呢兩日喺街頭為街坊寫揮春，為海嘯災民籌款。
傳真︰2623-9278
電郵︰