鄭裕彤長孫鄭志恒前日醉酒撞車，無損彤叔心情，噚日彤叔旗下嘅新創建喺灣仔運動場舉行一年一度嘅同樂日，彤叔下晏三點幾鐘到場，八方問佢乖孫情況如何，佢話：「冇事，多謝你。」
講開新創建，自新世界系大改組後以新名稱上市，唔經唔覺到今個月二十九號就上市兩周年，彤叔話，為咗慶祝新創建上市兩周年，要做啲有意義嘅事，所以定咗一月二十九日至二月二十八日為「新創建社會關懷月」，集團旗下所有員工喺呢個月最少都要參與做一份義工。
新創建旗下有多家公司，包括新巴、新渡輪、富城物業管理等，總共有成四萬員工，每人做一份義工，真係好有意義。問到彤叔集團今年有冇人工加時，佢就話，「應該有啩！」至於加幾多？「我唔知噃，呢啲唔係我理，你去問當事人啦，我唔理嘢㗎。」
傳真︰2623-9278
電郵︰