肺炎入院死過翻生
求驗客手記：加斯居尼當施文恩公

前英格蘭國腳加斯居尼死過翻生，肺炎無攞走佢條命，佢脫險後繼續狂人本色，既話自己曾經以為患愛滋病，又話自己咁都死唔去，似貓有九條命。不過佢都衷心多謝老友施文，話對方救佢一命喎。

以為感冒不以為然
話說加斯居尼入廠前，以為自己只係一般感冒，但聖誕節前同施文傾開電話，施文聽完「加薩」把聲同問清楚病況後，叫「加薩」即刻去搵阿仙奴兼英格蘭國家隊隊醫尼雲檢查。如果唔係咁，「加薩」根本唔會由紐卡素揸幾粒鐘車去倫敦。果然尼雲一查就知大件事，「加薩」半推半就至肯入廠，無幾耐就病危。「加薩」舊年曾經遇到交通意外，又兩次大病，佢話望就望○五年唔會咁黑仔，我求大俠都衷心祝福佢。

對住次級球隊特別醒艾恩梳技限於此？
前晚足總盃幫西布朗入兩球，作客以二比○淘汰英冠隊普雷斯頓嘅前鋒艾恩梳，似乎只限對次級球隊至會有好表現。呢位威爾斯前鋒今季加盟西布朗前，先後拎過甲（前英冠）、乙組（前英甲）聯賽神射手獎，不過今季首次亮相超聯就無乜表現，係隊波嘅問題定佢級數所限呢？

與巴西女友分隔兩地阿祖安奴偷會羅國索女
阿祖安奴一直好珍惜自己嘅前途，加盟國際米蘭後，佢特登揀咗個遠離市區嘅地方置業，以避開時裝之都嘅美女。但最近阿祖安奴同佢個巴西女友因為經常分隔兩地，感情轉淡，最近佢重被發現同一個羅馬尼亞靚女模特兒約會。畢竟阿祖安奴今年先二十二歲，定力係差㗎嘞。

「主場效應」直播見證華倫紐軍有運行
前晚西甲聯兩場直播，就話咗畀大家知乜叫做「主場效應」嘞。紐文西亞主場對畢爾包，個場地一邊龍門積雪，結果兩隊打成一比一，兩個入球都係積雪嗰邊龍門入，紐文西亞扳平嗰球重係遠射彈落雪地，收死對方門將㖭！華倫嗰場，米斯達入嗰球似乎未過白界，呢啲咪主隊着數囉。

為乙組奧咸射垮曼城「紅魔躉」維朗零舍興奮
英乙球隊奧咸前晚足總盃做咗「巨人殺手」，將英超聯球隊曼城淘汰出局；殺手中嘅殺手，即係為奧咸射入奠勝入球嘅維朗，原來係曼聯躉，重要係全家上下都好捧「紅魔鬼」，呢個入球可以令愛隊嘅同市死敵曼城出局，份外令佢興奮。我求大俠覺得曼城個傷口好似被人灑鹽咁。