日本人氣組合SMAP隊長中居正廣出晒名孤寒，雖然佢每次拍廣告酬勞都有八千萬日圓（約六百萬港元），但早前就被踢爆一缸沖涼水用足四日。近日，中居又因為出屎橋慳錢，激嬲咗二人組合KinKiKids嘅成員堂本剛。
據日本報章《東京Sports》報道，KinKiKids元旦當日喺東京巨蛋舉行演唱會，開騷前，身為尊尼事務所大師兄嘅中居正廣去到後台為師弟打氣。一見面，中居同兩位師弟大講新年快樂之外，佢又拎兩封HelloKitty利是出嚟，叫兩位師弟隨便揀一封。堂本光一同堂本剛對望一眼後，光一隨手揀咗其中一封，打開一睇，原來係一封五萬日圓（約三千七百港元）利是，當然開心到震。
阿剛就唔好彩，佢封利是淨係得一個一百yen硬幣（約港幣七元五角），深深不忿嘅阿剛忍唔住問中居：「你唔係講真吖？」中居就笑笑口咁話：「你由幾時開始，變得對錢咁斤斤計較？」前輩寒酸到出面，阿剛真係谷到一肚氣。
不過，有電視台工作人員爆料話，中居身為日本當紅藝人，畀後輩嘅利是公價都應該有五萬日圓。所以我羅拉都懷疑中居，因為唔想為KinKiKids兩人封十萬日圓利是，而諗出呢啲屎橋。為咗慳個幾千蚊，而俾人唱通街，中居係咪得不償失呢？