千嬅去年推出的歌曲《小城大事》大受歡迎,為她帶來不少獎項之餘亦增添不少壓力,千嬅說:「每逢頒獎禮前夕,我最唔開心係忽然多咗好多是非,好似話我去借運呢類謠言,我係好反感,我係唔相信一個人唔去努力、搞乜嘢借運就可以得到想要嘅嘢。如果係咁容易,全世界嘅人重使乜去畀心機做嘢?只有無知嘅人至會信呢啲嘢。」
千嬅續說:「點解歌手之間唔可以公平去競爭,係都要為達到某種目的去傷害人?呢啲事令我幾心淡,出道咗咁多年,我好明白𠵱家嘅頒獎禮只不過係一場遊戲,歌星已經唔係一定要睇你攞幾多獎去肯定自己一年嘅表現,反而我會較着重賣碟嘅數字,歌迷有幾支持自己。」
最感激黃柏高
一講到樂壇,千嬅有滿腹牢騷,不過她慶幸有一位很照顧自己的經理人黃柏高(Paco),她明白這幾年來Paco為自己披荊斬棘,才會有今日的成績,千嬅說:「呢排Paco真係好大壓力,有時我返到公司見佢粒聲唔出,一個人可以望住個海景好耐,我都唔敢去煩佢,我知道佢好想幫旗下每個歌星做到最好成績,有時佢覺得達唔到自己嘅指標會好自責。我覺得佢已經盡晒力,所以我從來唔會畀壓力佢,只會好感激佢。」
開拓內地市場
今年千嬅主力開拓內地市場,灌錄國語唱片,亦會參與更多幕後工作,千嬅說:「有時歌手本身會比較了解自己嘅音樂路向,所以無論揀歌或搵填詞人,我都會參與意見,咁樣歌手可以更投入去做一張唱片,為咗了解個潮流,平時我會迫自己睇好多外國MV同有關嘅書籍,亦會欣賞各類型電影,我做戲重未掌握得好好,呢方面要好好充實吓。」
南亞海嘯災難,令千嬅看化人生,她說:「有時睇見啲新聞片,我真係好有衝動想拋低一切,飛去災區做義工,我以前做過護士,所以見到咁多國家嘅醫生同護士去到災區做義工,自己好想出番一分力,但當然唔可以話走就走,不過如果有一日,我可以儲蓄到足夠嘅錢,屋企人嘅生活費唔需要再擔心嘅時候,我真係幾想跟無國界醫生去世界各地做義工,喺自己有生之年,如果可以幫到受災難影響嘅人,我先會覺得自己搵到做人嘅真正意義。」