盈大地產（432）嚟緊呢個星期，見有調整，要搞。留意盈大，唔單止係佢來自貝沙灣龐大利潤，重要留意兩批發畀阿媽電盈（008）嘅CB（可換股票據）。
盈大變身電盈地產旗艦時，向阿媽發行兩批CB，可兌換11.92億盈大新股。電盈經上年下旬，一口氣配股減持盈大，家陣揸住盈大57.1%權益（9.61億股），以現水位計數，就算電盈將兩批CB全數兌換盈大股份，都不過佔盈大已發行股本70%（21.53億股），重未去到75%爆燈水平，電盈大有條件行使兌換。
要咁睇，貝沙灣提供巨利，冇理由唔想分大份，電盈兌換行使盈大CB，條件及可能性相當充份。盈大最新造價2.425元，只係較第一批CB兌換價2.25元，有7%溢價；但相對第二批CB兌換價3.6元，有潛在50%升幅。若然股價咁筍，重有調整，重使諗？
新地（016）係本欄見報以來，第一隻寫嘅大藍籌。揀新地，唔係冇嘢寫，又講兩點。
技術性睇，新地經過上個星期倒水咁倒，最新造價71.75元，相當貼近2003年4月低位33.3元引伸上嚟中長期上升軌支持70.75元，所以，短短呢個星期走勢，係新地中線關鍵期走勢。亦即係話，若然喺呢個大型支持兼關鍵位博撈底，好易做人，跌穿70.75元走人，上望1年高位80.75元，賠率係1蚊博9蚊，亦抵博。
第二，唔少大行呢期推報告，將新地每股資產值調高，由77.97元至83.13元不等，雖則，新地現價相對經重估後每股資產值，折讓最多亦不過13%，但大孖沙不斷重估資產值，心態反映，大戶似乎未夠喉。
錢雋