馮仁昭四圍超：
華仔衰多手掟螢光棒　捏龜妹妹

劉德華噚日去咗海洋公園出席「第十屆海洋公園鯨豚保護日」活動，席間好多小朋友扮成海洋生物同華仔影大合照，大會重安排華仔頒獎狀畀參加呢個獎勵計劃嘅學生兼影相㖭。
不過華仔都好大細路，佢見啲小朋友咁得意，忍唔住手拖吓佢哋之餘，亦手多多掹身邊扮海龜嗰位小妹妹頭上頂帽，逗得個小妹妹不知幾開心。

代全港藝人道歉
講起南亞賑災，華仔國際歌迷會已籌咗十一萬幾，華仔就話：「我捐埋啲尾數，總共十二萬啦！」另外，曾志偉話大球場義演尾段，啲歌手將螢光棒掟出去，搞到現場觀眾有樣學樣，點知華仔聽到呢番說話之後就後悔咁話：「我嗰晚手上拎住百幾支螢光棒，因為聽到有三千幾萬善款好興奮，我都忍唔住掟咗兩支，但見觀眾反應熱烈怕有危險，所以都收手。我𠵱家代全港藝人講對唔住、道歉囉！」
而下月二十六日北京將會舉行反盜版活動，華仔、金庸同埋馮小剛等人被欽點出席，做形象大使。

阿姐同大黃狗爭食
汪明荃噚日喺將軍澳電視廣播城拍攝無綫新劇《我的野蠻奶奶》，劇中阿姐慘到要同隻狗爭饅頭食，好彩佢唔驚狗，因為屋企養咗三隻大狗，重讚隻狗乖巧。
問到有報道話胡杏兒拍呢套劇時只顧休息經常忘記對白，阿姐力撐對方話：「佢拍呢套劇冇得瞓重辛苦過我，佢向來都好好，重好叻女。」

陳法蓉上海救姚煒
姚煒噚日喺上海出席鄭明明嘅宣傳活動時突然暈低，攞咗潛水急救教練證嘅陳法蓉幫手急救，之後送咗去醫院。馮仁昭聯絡咗姚煒，佢重喺醫院，醫生下周同佢做全身檢查。佢話啱啱去完美國，又趕住去上海，可能攰得滯。

鄺美雲忍聲沙做接線生
鄺美雲、關淑怡同蔡一傑都係以前寶麗金唱片公司嘅歌手，前晚佢哋喺《愛心無國界演藝界大匯演》碰頭，活動後就一齊消夜敍舊，其間遇到狗仔隊影相，鄺美雲嚇到呆咗。前晚大滙演，鄺美雲因聲音沙啞冇唱歌，只做接線生，現場佢重同朋友捐多十二萬。