楊千嬅與鄭中基分手後，最近傳出與古天樂擦出愛火花，縱使兩位當事人否認有關報道，但千嬅對古仔印象甚佳，更不排除有發展的可能。而千嬅去年的聖誕節亦過得特別開心，除了因為困擾多時的煩惱終於解脫外，她更收到一件特別的禮物。 撰文：陳月媚 攝影：陳慧安
出道十年的楊千嬅緋聞不算多，過去大眾的注意力都集中在她與鄭中基斷斷續續的戀情上，不過隨着上月有周刊指千嬅與古天樂拍拖，她的感情似乎亦揭開新一頁。
姑勿論緋聞是否屬實，但千嬅日前接受本報訪問時的確神采飛揚，如沐春風，她大方表示剛度過了一個愉快又難忘的聖誕節，並收到一份特別的禮物。
兩人相處不能執着
提到與鄭中基一段逝去的感情，千嬅說：「呢段感情有過開心時刻，同時亦有痛苦回憶，但我冇後悔過，從中我明白到兩個人相處要識得溝通，某啲問題上唔好咁執着。其實鄭生係一個唔錯嘅朋友，但作為情人，我同佢可能有好多方面攞唔到一個共識啦！既然冇緣份再走埋一齊，何必要勉強？𠵱家依然會當鄭生係朋友。我當然想再有人追，可以有一段新感情發展，不過暫時我需要時間先整理吓自己情緒，未必咁快可以即刻接受一段新感情，所以𠵱家只想畀自己忙啲，唔諗其他嘢。」
對於近期與古仔傳出緋聞，雖然千嬅強調兩人只是好朋友，但她對古仔有讚沒彈，千嬅說：「古仔係一個幾可靠嘅朋友，佢對家庭好有責任感，又孝順，對朋友又夠義氣，但我同佢呢一刻重係好朋友關係啫！將來同佢可唔可以走埋一齊，天曉得？如果有一段新戀情係發展得好穩定，而我相信嗰個人會係結婚對象，對方又唔反對嘅話，我係唔介意公開感情。𠵱家係乜世代？我唔係要走玉女形象，當然唔相信拍拖會影響事業發展啦。」
去年聖誕特別開心
千嬅坦言不輕易接受一段新感情，但亦不會抗拒異性追求，她說：「我都三十歲啦！有唔同男仔約我出街，證明自己重有吸引力，點解唔試吓？可能試吓試吓，我先知邊個係真命天子！如果遇到有一個係啱嘅，我會好赤裸咁俾佢知道晒我嘅性格，起碼佢要知道我唔係嗰啲細細聲笑、好文靜嘅女仔，如果對方認為接受到，咁大家先發展落去，相信呢段感情會比較健康。」
上個月聖誕節，千嬅形容很多年已沒有過得如此愉快，難道這個聖誕特別浪漫？千嬅笑說：「平安夜同聖誕兩晚，其實我都係同一班朋友一齊度過，並唔係你想象中嘅浪漫聖誕，呢個聖誕過得開心，可能因為有啲煩擾咗自己好耐嘅事終於有一個解脫，同一班好朋友開開心心咁過節，特別覺得輕鬆。而且今年收到一份幾特別嘅禮物，嗰份禮物我諗住買嚟送畀一個好朋友，我最後冇買到，但結果係呢位朋友買咗呢份禮送畀我，所以收到嗰一刻係幾開心㗎！」不過千嬅堅決不肯透露對方是男或女！
