香港派去布吉嘅百人支援大隊，個幾禮拜就陸陸續續分批撤走，𠵱家剩番約四十人留守，連阿頭保安局首席助理秘書長蘇家碧都走埋，有唔少人批評支援隊無功而還，一啲貢獻都冇；不過作為新聞界一分子，點都要偏私為佢哋講句好話，因為支援隊雖然搵唔到幾多個失蹤港人，但至少都「救咗」幾個喺布吉採訪嘅本港記者。
其中喺布吉嘅入境處同醫療輔助隊人員可以話係香港記者嘅「救命恩人」，噚日就有個《明報》女攝影記者趕住返香港，點知臨上機，打鑼搵勻都唔見本護照，最後至發現原來一個早過佢返香港嘅烏龍同事，竟然將佢本護照都帶走埋，好彩有入境處人員即時同佢影相，即刻辦理一個臨時護照，至可以上到飛機。
另外較早前，有個《星島日報》嘅攝記採訪時意外整傷隻腳，亦係由醫療輔助隊員幫佢洗傷口；又有個《南早》記者可能做嘢太搏命，差啲暈低，好彩有醫療輔助隊員照顧佢至冇事。
反而人數最多嘅警隊就冇乜「建樹」，佢哋可能太得閒，唯一可以做就係設法阻止香港記者採訪，原本泰國當地對記者好幫得手，亦好尊重新聞自由，但係香港警方就將香港嘅做法帶晒去布吉，例如有次佢哋去到一個停屍所，首先唔係搵香港人，第一件事就係設立封鎖線，禁止記者採訪，扮埋高度機密，結果又係乜都做唔到。
傳真︰2623-9278
電郵︰