個市最慘情之時，恒指大散309點，落到13403，當時9RSI得番19.10。濠賭股變晒形，窩輪市場更直頭好似海嘯咁，C輪得番6-7成。喺低位夠膽撈貨嘅，尾市已經可以執2、3成。
個市驚濤駭浪，𠵱家喺窩輪鱷魚潭內行走，就好似喺大海中釣魚，可能釣到大魚，亦可能反艇，葬身魚腹。入場玩兩手，記得控制注碼，控制風險。
澳元滙價輪：上禮拜六講過點樣炒外幣兌美元窩輪。睇好澳元兌美元，買澳美C輪3511，睇淡則買澳美P輪3515。過去一個禮拜，澳元兌美元由0.7828落到0.7647，結果3511跌，3515升。
估計澳元再跌些少，會有機會升番，趁低買3511。隻輪5月尾到期，輪價23.2仙，溢價2.0%，槓桿率25.6倍（有效18.5倍），引伸波幅8.6%。隻輪唔係冷門貨，昨日有近26球易手。
歐元滙價輪：睇好歐元兌美元，買歐美C輪4653，睇淡則買歐美P輪4657。過去一個禮拜歐元兌美元由1.3556跌到1.3225，自然係4653跌而4657升。
𠵱家博歐元止跌回升，重入上升軌，買4653好過買4657。4653喺5月尾夠鐘，輪價28.5仙，溢價4.3%，槓桿率36.1倍（有效16倍），引伸波幅14.3%。隻輪溢價唔細，炒賣要快手快腳。
章盛