全城熱論林煥光，特別係官場同政界，幾乎連賑災大滙演都冇人理，只係不斷去八卦究竟阿特首辦主任係為情犧牲仕途，定係借緋聞消息跳船。八方綜合眾多素來知情人士嘅意見，都係四個字：「冇咁簡單」！
才子風流自古皆然，身為高官，多幾個女朋友，紓解平日俾老董激俾市民抦嘅鬱氣，好正常。早喺殖民地時代，最後一任鬼佬律政司馬富善，佢位夫人上《南華早報》頭版大數夫郎薄倖，結果點？馬官咪又安然做到任期完結，高官本地化潮流對佢完全冇影響。
又如歷事兩朝、又有權又有錢嘅金管局總裁任志剛，主動在報紙大爆與前妻志趣不投，博得全中環賓架同情。冇耐重同嬌滴滴嘅秘書拉埋天窗，大宴親朋，何嘗要深夜請辭，即時生效？
重有，就係三點不露嘅李國寶。李議員同名門閨秀去外埠度假，同林主任差不多，但連房門口對鞋都上埋鏡，論精采程度，遠遠比《忽然1周》呢一期忽然政治個古仔更震撼。點呢？冇嘢發生噃，跟住重拖埋李夫人一齊去旅行，不知幾恩愛。
八方記得，喺置地廣場門口影到林煥光送紅顏上的士張相，已經係幾年前嘅事。之後有關緋聞爆到七彩，到最近有人報料，話才子佳人一齊食日本菜，八方都冇理。今次《忽周》順手執隻古仔，點解咁大件事連佢哋個老總都木宰羊（不知道），又難怪啲政壇八公八婆咁多嘢講。
林煥光噚日話前晚瞓得好好。可能佢平日念經念得多，已修成正果，視金錢權位如浮雲，唔使去請教過來人任志剛、李國寶點樣管理危機。
傳真︰2623-9278
電郵︰