全球起勢捐獻，賑濟南亞災民，美記內部籌款三十萬，先前交紅十字會，噚日輪到美聯慈善基金，二十萬捐「愛心無國界演藝界大匯演」。
同時，利記員工，只係一日半就籌到二十七萬，轉予樂施會。至於中記，話目標籌八十萬，三十萬已交樂施會。
地產代理一向予人市儈感覺，今次主動籌款，可以洗刷負面形象。
另外，內地發展商SOHO中國，董事長潘石屹，聖誕舉家去印尼峇里島度假，因為冇開手機，搞到好多朋友打電話搵唔到佢，以為佢俾大浪捲走咗。後來回國，至知印尼爆大鑊。佢慶幸逃過大難，決定捐一百萬畀紅十字會。
澳門樓市熱火朝天，吸引香港同內地資金，入市掃貨，前景秀麗，但一個揸香港身份證，喺澳門經商多年嘅商家，竟然冇「近水樓臺」，買番啲投資，反而首度喺香港置業。
利記周樂話，個客較早時參觀深井碧堤半島，睇咗一粒鐘就拍板，用近四百三十四萬，買入第五座五十六樓A單位，一千零五十一呎，呎價四千一。
周樂話，買家入市，除咗因為發展商送二十萬現金禮券外，重有就係睇好大嶼山迪士尼樂園，同港珠澳大橋落成，對樓市起帶動作用。
裕泰興上環酒店地盤標售，一拖再拖，話想睇埋附近另一地盤截標成績，奈何敵方又將噚日截標日期，延至比裕泰興地盤最後截標日遲兩日，即係今個月二十六日，重話有得減價㖭。
代理一太話，干諾道西一三七至一三八號地盤，可作商住或酒店發展，業主叫價五千三萬，每呎樓面地價二千。買家重計緊數，所以業主延期截標。
蘭西記得，地盤最初意向價係五千八萬，唔知係咪有競爭，定係聽聞泓都以低於市場預期價錢內購，所以業主讓步？
寫字樓造價節節上升，中環核心優質商廈，賣到過萬蚊一呎，回報跌至兩厘，投資者不妨留意吓啲冷門選擇。
好似美記搞緊招標嘅長沙灣青山道一九三號商廈，十二層高，萬呎樓面，唔近地鐵站，但都幾值租。三年前落成，租過畀間保健中心，月租二十二萬，每呎二十一蚊，同中環甲級寫字樓，喺個市最差嗰陣嘅租金差唔多。
現時租客搬走咗，有買家出價二千餘萬洽購，若果按照舊租金計算，有超過十厘回報。
電郵地址：