日廣告界明益過江龍
章子怡746萬身價壓木村

日本組合SMAP入行雖然超過十年，但五位成員重係好受日本廣告界歡迎，佢哋喺今年嘅廣告薪酬仍然係日本最高，平均接一個廣告就有成三億日圓（約二千二百萬港元）嘅收入，至於過江龍章子怡都唔少嘢，佢今年喺日本嘅廣告薪酬暴升到一億日圓（約七百四十六萬港元）。

五子之冠
新一期日本市場調查雜誌《日經Entertainment》，公開咗○五年二百位藝人喺日本嘅廣告身價，其中SMAP拍一個廣告嘅薪酬有成三億日圓，係咁多藝人之中最高。而身為兩女之父、拍露點相仍甚有睇頭嘅SMAP成員木村拓哉，廣告酬勞係五子之中最高，佢拍一個廣告可以賺九千萬日圓（約六百七十萬港元）。
不過憑電影《臥虎藏龍》喺國際打響名堂嘅章子怡，比起木村重厲害，佢拍一個廣告可賺到一億日圓，薪酬同高倉健、明石家森馬及裴勇俊等巨星睇齊，身價只係比當紅嘅渡邊謙低啲。

步姐暴跌
不過，人氣大不如前嘅濱崎步同Morning娘就慘啲，佢哋今年嘅身價明顯下跌，步姐今年拍一個廣告只有八千萬日圓（約五百九十六萬港元），而晨女嘅薪酬亦只得七千萬日圓（約五百二十一萬港元）。