【本報訊】電影《拳霸》男主角、泰籍演員TonyJaa昨日專程來港參加「愛心無國界演藝界大匯演」。TonyJaa在台上呼籲，由藝人盧惠光擔任繙譯，TonyJaa向觀眾展示從泰國帶來有關報道海嘯的新聞。TonyJaa說：「見到泰國呢啲新聞，好多人都唔希望發生，但都發生咗，希望全世界人有錢出錢，有力出力，幫助佢哋重建家園，畀信心佢哋。」TonyJaa還以純正的廣東話講出捐款熱線電話號碼，希望巿民多多支持。
許冠文昨日在大匯演中表示，天氣雖然很冷，但大家內心卻感覺到溫暖，許冠文說：「噚日成龍問我，究竟上帝去咗邊度，我同成龍講，話上帝造人，其實係畀自己主宰生命權力，即係等於自己執生，人類係要自己幫助自己，自己關懷自己，自己提攜自己，去面對困難災難。作為香港人，都會感到自豪，因為截至噚日為止，香港嘅賑災善款係達到六億二千萬，以香港六百幾萬人口嚟講，即係平均每個香港人捐咗九十幾蚊，打破晒世界紀錄。」
許冠文又指近日翻開報章，看到不少令人感動落淚的新聞，包括赤柱監獄七百六十四個犯人合共捐出逾十四萬元賑災，而一位失業的婦人，也響應街市義買，花了一千五百元買菜和粉麵；許冠文說：「上帝見到都會感動！人類係可以自己執生！希望無論捐過錢或者係未捐過嘅市民，都會重新考慮，將愛心送畀遠方嘅心靈，等佢哋重建家園。」許冠文的一席話，惹來全場如雷掌聲。