司徒華離開政壇，但仍好關心政界，林煥光辭職，華叔都認定佢唔係因為緋聞遞信，而係因長期不滿老董，今次借機走人，同董團夥劃清界線。班高官條氣唔順已經街知巷聞，更何況人大釋法，香港「一國兩制」壽終正寢亦已成事實，林煥光也心知一個人無力挽，所以佢意興闌珊，乘機起義都唔出奇。不過，亦有官場中人覺得冇可能，因為緋聞始終唔係好嘢，佢可能為免老董尷尬而掛冠。
點都好，華叔同李國寶都覺得林煥光嘅緋聞唔係第一次講，冇理由以前唔走，今次走。寶哥哥噚日喺立法會俾記者追問，佢一味話覺得唔會係感情私事咁簡單，佢重笑啲記者個個都寫過佢有女朋友，唔明解佢做乜要辭職。
寶哥哥同林煥光唔係幾熟，但係覺得佢好好人。林煥光留低咁多問號畀大家，睇怕遲吓佢都要搵班老友飲茶解吓畫。
傳真︰2623-9278
電郵︰