早兩日小初好多老友重係興高采烈，但噚日多得賭王一番言論，同埋期指佬玩嘢，港股再成為殺戮戰場，真係遍地屍骸。
尤其係早幾日勁升的嘉華國際（173）同埋嘉華建材（027），兩股噚日一度勁插3成，近日先至上車的炒家，絕大部份輸到一頸血。
嘉華國際昨日最低見2.425元，收2.925元，跌27.33％，至於嘉華建材最低見過5.40元，收市則上返去7.30元，跌幅收窄至21.93％。兩母子成交加埋有成17億元，大過唔少藍籌股，就知有幾多散戶傷亡慘重。
究竟家陣係咪時候還原基本步，番基本因素呢？經紀黃話，上個月中佢強力推介業績靚靚嘅其士國際（025），當時為7.20元左右，噚日大市勁跌，但都係平收8元，就知道股票有基本因素始終較為信得過。
佢又話，其士國際早幾日有大手成交，原來係金手指睇中，按每股7.425元，購入1500萬股，即係5.38％咁多，擺明係為投資者打支強心針。
慕容小初