《愛心無國界大匯演》昨日一呼百應，年輕一輩歌手包括梁詠琪及何超儀等，昨日義演之餘更準備當義工助災民，而年長一輩如譚倩紅和林蛟等則為活動擔任義工，甚至近期甚少露面的藍潔瑛也自動請纓接聽捐款電話，齊齊為賑災出一分力。
梁詠琪（GiGi）及何超儀等昨日均有參與大球場《愛心無國界演藝界大匯演》，兩位歌手除即場呼籲市民捐款外，更不約而同表示有意做義工。
GiGi說：「現場播番災區啲片段，睇到好心噏！我知道香港嘅『聯合國兒童基金會』雖然籌到好多善款，但就唔夠人手去處理，所以我諗住同班朋友一齊幫手做義工，處理呢啲善款。」儘管GiGi昨日演出時現場僅得二、三千觀眾，但她也毫不介意說：「冇得計較，都係出番一分力啫。」
何超儀則計劃與丈夫陳子聰到災區做義工，超儀說：「我不停叫朋友捐錢，我自己都捐咗，重想去災區做義工，因為我都有朋友喺斯里蘭卡，知道嗰度一街都係難民，好想去幫吓手、體驗吓，我諗會好激動，我重想助養當地啲小朋友㖭。」
年輕一輩計劃到災區做義工，年長藝人昨日則自發到大球場做義工，包括八両金、譚倩紅及林蛟等，近日甚少在公開場合露面的藍潔瑛，昨日亦負責接聽捐款電話。部份藝人更帶備私人物品到場準備隨時拍賣籌款。
另一方面，日前撞車受傷的董敏莉，原本仍要留院接受治療，但為支持賑災活動，她特別負傷到場呼籲，頸上戴上頸箍及手持暖包的董敏莉說：「我唔會唱歌，但都嚟支持吓，自己已經比好多人幸運，醫生亦話我好好彩，冇內傷冇骨折，只係肌肉嚴重抽筋，以及講嘢同呼吸時右邊好辛苦。𠵱家我不停做物理治療，媽咪已經沒收咗我車牌，唔畀我揸車。」
此外，吳君如昨日亦抱病上陣，下午綵排期間她曾因發燒而要睇醫生，不過打完針後又返回大球場作準備。而一班歌手合唱一曲《愛》時，因沒有綵排而頻頻甩嘴兼走音，顯得有點亂，張栢芝便因忘記歌詞而以笑遮醜。
採訪：胡比、陳月萍、張俊銘、何永寧
攝影：林德雄、葉君海
