台灣馬九哥被拒入境特區，繼續引起台海海嘯！又係嘅，堂堂一個俊男市長兼國民黨接班人，想去香港出席文化講座，咁都俾人列入黑名單，當做販毒及恐怖分子、跳船走難嘅非法移民看待，若果你係台灣人，都會向住廢董「呸」一聲！
連在港大掛單嘅龍應台教授，都激到面青青兼幾乎出唔到聲，大罵中董當局「盲目無知」（吓？去到咁盡，唔通小龍女教授唔怕自己留港嘅工作簽證會遭到董團夥通知提早註銷、驅逐回台？）可見董團夥之天怒人怨！
不過，喺馬會廂座、中環會所，現時經已有盤，賭廢董三月前保外就醫，由曾灶財攝政，重講到似層層，話三月兩會，將會確定廢董後台大老細江總，交出國家軍委主席，咁壽爺最近橫掂整頓緊省市軍區人事，安插自己啲馬入局，不如順勢清埋嘉慧園個場！
迹象之一，就係馬小九呢鑊入境黑名單醜聞，董團夥孭到應，聲名狼藉不堪，若然係以壽爺為首嘅中央人民政府授意，冇理由唔挺身保護廢董，對外聲明，話拒絕馬小九入境，完全係中央人民政府嘅決定，不過由廢董如常聽話執行。
但壽爺上面冇句聲，反而中聯辦肥佬高笑笑口話歡迎馬小九，即係話唔關中方事，任由廢董喺台港兩地被吐口水，你死你賤，咁你話胡溫班子，究竟睇唔睇廢董台戲，定係想佢孭多一身箭再搣飛？
之不過，若然殺馬唔係壽爺中央所授意，而係廢董自稱揣摸主上心意，自把自為，咁亦更大鑊。即是破壞祖國統一及統戰政策，將馬小九推番過反中護台嘅台獨主流嗰邊，至於咁係廢董再次「好心做壞事」而倒米，定係受某啲外國勢力甚至陳水扁指使，令到壽爺溫寶撕下面具露本相，咁就唔知嘞！所以八方都呼籲過國家，要慎防董團夥喺○七之前蓄意埋地雷，靠害我哋祖國嘅喇。
不過，亦有啲「收唔到風，以為靈通」嘅老左，彈出嚟做揩抹工作，話摑馬小九一巴，唔畀入境，查實係胡溫意思，因為想保護小九，費事佢來一趟特區，返去俾人再話佢生香港腳，同埋與中方地下人員密商點樣裏應外合迎接解放軍攻台，斷送下屆做台灣總統嘅機會咁講！
吓？咁李柱銘及長毛等冇回鄉證，原來亦係受到胡溫嘅保護，怕佢哋去完北京一次返落來，俾港人認為佢哋通敵，下次就冇晒啲選票嘞！原來係咁，媽田及長毛，重唔對壽爺敬個禮，講聲Thankyou？
傳真︰2623-9278
電郵︰