原來唔只澳門賭業股炒得，證券股一樣得，但當然係各有前因莫羨人，噚日結好（064）配股畀5位知名人物，股價當堂升到你唔信，可以話係全城矚目。
經紀陳話，雖然結好噚日勁升122％，但聽聞大孖沙唔會咁快沽貨食胡，重話有唔少友好會接力買入，所以就算結好今日股價再升，佢亦唔會覺得出奇。
結好日前配股，出動到大劉、彤叔同埋四太接貨，成個組合星光熠熠，雖然通告話集資所得，只係作一般營運資金，但無情情集資成億銀，話冇嘢搞都好難搵人信，結好昨日高收4.40元，成交高達7.56億元。
另外，自從奧瑪仕（959）有份嘅希臘神話賭場開幕後，股價亦由4.10元高位跌落嚟，兼且有主要股東頻頻減持，但去到2.50元附近似乎有支持。經紀陳話，聽講有關人等已經陸續出返嚟做嘢，但由於有唔少人在高位沽貨獲利，所以貨源甚為分散，要再好似先前咁一條氣炒上，相信唔容易。
奧瑪仕昨日最高反彈至2.85元，收2.75元，升6.79％，成交股數8628萬股，金額2.37億元。
慕容小初