立法會噚日辯論西九計劃，長毛同楊森一如以往，批評西九係數碼港嘅翻版。煲呔就力撐，數碼港唔係得個貝沙灣，佢話星爺主演嘅《功夫》，啲特技就係由先濤數碼公司喺數碼港整嘅！煲呔重話，先濤送咗四張《功夫》贈券畀佢，佢會分兩張出嚟，一張送畀楊森，一張送畀長毛，「希望佢哋研究一吓數碼港嘅威力」！
長毛話佢唔得閒睇，佢會畀張飛楊森，等佢同老婆去睇，不過楊森睇嚟唔係星爺嘅fans，佢又話唔會去睇。睇嚟嗰兩張飛最後都會嘥咗。
不過，八方都好想問，係咪間公司唔喺數碼港，就唔識整電腦特技呢？如果成個數碼港，都係得間電腦特技公司值得一提，咁係唔係應該檢討吓呢？煲呔呢鋪真係自暴其短啦！
數碼港最出名梗係貝沙灣啦，要研究數碼港嘅威力，煲呔不如送佢哋每人一幢貝沙灣好過啦，包保佢哋即刻明白晒！
傳真︰2623-9278
電郵︰