大市繼續調整，但上升股隻（不計認股證）有415隻，遠比下跌股之228隻為多，市場好明顯係個別發展，炒股唔炒市，上升股中，又以澳門概念股為主流，噚日升幅最大係結好控股（064），最高搶到上4.425元，收4.40元，大升2.42元，升幅122%！
除結好外，噚日復牌嘅有冠中地產（193）同和成國際（651）兩股都有可觀升幅，前者收3.7仙，升19.3%；後者收10.5仙，升47.8%，成交都係賓虛咁嘅場面，消息就話重有得去。講番隻結好，噚日能夠高收到4字頭，話唔定今日又會裂口高開；「披成」接貨者成個鑽石陣容，1股都冇出街，聽聞噚日重有人係咁喺市場掃貨，後市睇幾多？有人話會見到兩位數。
嘉華系孖寶係咁上，真命天子嘉華建材（027）高收9.35元，大升1.75元，升幅23%，距離兩位數只差幾步而已；嘉華國際（173）終於升破4元大關，收4.025元，升15.8%，聽聞注資佳期已定，下禮拜就會有好戲上演。
生命科技（1180）做電子百家樂，好事亦近，噚日股價已破位而上，最高18.4仙，收17.5仙，大升26.8%，買盤中隱約見有芬佬嘅手影，相信股價好快會見2字頭。
另外要留意隻香港華人（655），收1.63元，逆市再升4仙，呢隻股票早一輪已有消息話會染「濠」，近兩三日股價都幾波動，好似噚日中段就一度搶到上1.70元，呢啲係大戶買貨常見嘅手法，佢𠵱家嘅走勢形成大型上升三角形，若升破1.80元阻力，短期嘅量度上升目標指向2.60元！
中盈控股（766）噚日亦有異動，收43.5仙，升3仙，升幅7.4%，近3日成交分別係2.05億股、1.66億股同0.83億股，合共4.54億股，中盈發行8億股，大股東持有75%，街外貨只得2億股，亦即9成9在40仙樓上已落晒強者手中。
中盈計劃染「濠」，上月底所出嘅中期報告，先話會進軍澳門嘅旅遊娛樂業務，事隔幾日，就已經聲明同財團洽商緊在澳門做酒店，兵行神速。聽聞係有高人指點，濠江同內地有勢力人士聯袂上馬，應有後着。最重要係中盈未升過，𠵱家重係在1年來嘅低位，升勢一發動，起碼到去年中60仙先有阻力。
郭兆誠