好多立法會議員都好勤力、好有發言意欲，所以先搞到立法會開大會，成日都要開到三更半夜，甚至要連星期四都開埋。
不過，立法會都有啲害群之馬，成日唔見人，唔知去咗邊，搞到開開吓會，成日唔夠法定人數，要中途暫停會議，叫番啲人返嚟開會。
好似今次辯論西九咁，前晚星期三九點幾，煲呔都忍唔住要叫范太數人頭；噚日原本兩點半復會，但都好似唔夠人，搞到遲咗幾分鐘先可以開會。
當然有啲時候真係好難分身，好似前晚咁，田少娶新抱擺酒，成個自由黨又要開會，又要祝賀田少，結果自由黨嘅議員去到晚宴，連第一道餸都未上，就要拿拿臨返立法會投票；唔使去立法會嘅老董，就可以食埋甜品。
此外，長毛噚日搵咗范太，投訴上星期日喺立法會停車場俾差佬拉。長毛話，范太叫佢正式寫封信畀佢，信已經寫好畀咗佢；至於差佬嗰邊，高級助理警務處處長任達榮就搵緊佢傾呢單嘢。
傳真︰2623-9278
電郵︰