熱刺文迪斯入球枉判無效後,引發多個球例問題,國際足協主席白禮達提到足球比賽另一重要問題越位時,又想修改條例,如果實行都影響極大。
現時越位就係球員處越位,就算無接觸皮球,都有機會被球證判越位;而白禮達計劃修改條例,就係只要接觸皮球嘅球員無越位,其他有越位球員都唔會被判越位,球例上俗稱取消「被動越位」。建議有人贊成、有人反對,好似「老馬」施薩馬甸尼就贊成,反而經常利用越位灰色條例嘅雲格就反對。
依我求大俠所理解,即係話日後條例通過後,攻方可以派幾個球員企係禁區內做「人海戰術」,只要底線傳中位球員無越位就得嘞。
新例令比賽節奏唔使成日中斷,但灰色地帶重含糊。既然龍門內裝電眼,點解唔用科技解決埋越位問題?
「球王」馬勒當拿(圖)早就退休,名氣大自然商機無限;最近佢允許一間公司利用佢嘅肖像權,開發手提電話足球遊戲,實行將昔日精湛球技重現手提電話螢光幕,進攻日本同中國市場。如果反應理想,開發商將推出其他阿根廷球星嘅手電遊戲,今後足球明星又有一個搵錢途徑。
球員轉會市場開番後,意大利球壇交投淡靜,暫時較受注目都重係森多利亞嘅國腳前鋒射手巴辛尼有可能過檔拉素。拉素實力今非昔比,成日減人工,當大家懷疑巴辛尼點解想委身拉素,近日傳出佢就快同響羅馬生活嘅豔星莫芝結婚,咁大家應該明晒佢點解想轉投拉素啦。
日前曼聯對熱刺嗰個入咗白界線成米咁多嘅「無效入球」,都可算我求大俠睇咁年波以嚟,見過最荒唐事件之一。射出嗰球嘅熱刺中場文迪斯,事後梗係猛話唔抵啦;原來呢位葡萄牙中場,兩季前效力甘馬雷斯時,亦有喺中場線位置笠死對方門將嘅前科;呢一下並唔係無心插柳㗎。
在對曼聯對熱刺場英超聯「孭鑊」、判熱刺中場文迪斯入球無效嘅旁證李維士,事後唔認自己犯錯,重死撐當時離個波成廿五碼,睇唔清楚都好正常。聽聞佢有望喺○六年世界盃決賽周執法,𠵱家佢錯唔能改,我求大俠真係擔心到時又會有「世紀問題球」出現,成為笑柄。