喺九倉商場開設嘅超市CitySuper，生意相當好，九倉主席吳光正家族都有揸番啲權益。最近超市同九倉簽約，繼續租用銅鑼灣時代廣場同尖沙嘴港威商場舖。
時代廣場舖租用四萬三千呎，租期六年零十個月，呢三年租金二千二百七十萬至二千三百三十萬，或每年營業額嘅八點五至八點七五巴仙，以較高者為準。期內最高年租上限係近五千五萬至七千萬。該舖原租四萬二千呎，租期至○八年，𠵱家要先終止舊約，再簽新約。
港威租用五萬一千呎，續租年期六年，另○六年可增四千六百呎，租期四年另九個月。年租千三萬至千七萬，或年營業額百分之七點二五，高者為準，上限係年租四千五百幾萬到六千七百幾萬。
若以上限租金計，今年時代廣場舖，連空調管理費呎租一百零六蚊；港威係七十四蚊。
信和置業上水御林皇府，全部都係幾千呎嘅巨型洋房，噚日開放A型屋，唔單止面積最大，洋房有七千六百幾呎，連花園都過萬呎。
為咗畀大家睇吓個花園幾咁大，發展商特登喺個私家花園入面，安排一場小型騎術表演，順便又可以提吓啲買家，附近有個賽馬會俱樂部。
花園一共擺咗五個欄，由專業騎師，策騎四匹駿馬，輪流表演跳欄。雖然隻隻馬都咁大隻，不過一齊企喺花園，都唔見得迫，咁就可知道，個花園到底有幾大。
馬術表演，喺香港唔係經常有得睇，重要係樓盤宣傳，就更加少見。
愉景灣度假概念小島，早排因補地價風波，搞到新聞多多。唔經唔覺，興業發展愉景灣三十幾年，噚日玩懷舊，同傳媒聚餐，搵嚟二十幾年前宣傳片，裏面有唔少珍貴片段，見證咁多年呢個島嘅變化。
片段有實業家、查氏集團創始人查濟民自白，長子查懋聲更親力親為，當年發展愉景灣，親自揸小型飛機，喺上空視察，重同唔少專家交頭接耳。片段八二年製作，紀錄當年點樣開山劈石，愉景灣嘅面貌，專家建議嘅發展藍圖等。今日睇番，真係兩個世界。
舊年工商舖市熾熱，美記舊年最佳營業員，仍然係工商舖部天下，冠軍係香港舖位部客戶經理梁國文，個人營業額二千四百萬，再度冧庄。前年做九百八十萬，舊年增兩倍幾。
佢促成買賣九十四宗，最矚目係旺角電腦中心商場同尖沙嘴流尚店。
講開工商舖部，聽講，工商舖行政總裁黃子華，見澳門火熱，有興趣過江做顧問。不過，因為佢出掌美記工商舖部以嚟，部門年年有賺，相信唔會完全放棄本港地盤。
本港舖市，舊年租售價大升，原來內地客都係功臣之一。
金豐易居劉志傑話，太子始創中心對面荔枝角道一號，嘉業大廈地下G舖，剛以二千萬轉手。原業主係內地客，○三年八月以近千四萬買入，面積一千呎，唔夠年半，賺咗六百八十八萬，升值近五成，認真夠眼光。
劉志傑話，過去一年，公司引入咗兩億內地資金，嚟港買舖，今年預料更多，因為現時已經有兩個客，合資二億買舖。睇嚟舖市有排熱鬧。
舊年樓市好景，各大代理行已經急不及待，四處猛開分行，大事擴充搵錢。
同時，測量師行同樣收入豐厚，都要增聘人手，應付龐大需求。
中原測量師行董事總經理黎堅輝表示，去年公司營業額勁增超過一倍。其中估值服務，增長最大。今年睇嚟，市況仍然樂觀，所以公司短期內會請多三個測量師，而人手就計劃加多五成。
黎堅輝透露，公司最近擢升咗十三個員工，加薪幅度由五個巴仙至兩成，認真唔錯。
電郵地址：
