日本女仔最鍾意化妝扮靚，每年都花唔少錢買化妝品，所以日本化妝品公司都好捨得投資拍廣告搶客。近排就分別有兩個不同嘅日本化妝品公司全力催谷○五春夏系列嘅新產品。
已為日本化妝品牌PN擔任多年代言人嘅日本女星伊東美咲，近排再為春夏新一系列嘅唇膏拍咗一輯廣告。喺今次嘅新廣告中，伊東唔再係單人匹馬上陣，佢特別搵咗模特兒鈴木惠美同女星RYO兩位新代言人齊齊同佢拍廣告，增加唔少新鮮感。
今年十七歲嘅鈴木惠美，係日本年輕人時裝雜誌《SEVENTEEN》嘅人氣模特兒。憑住高䠷纖瘦嘅身材，惠美已經成為日本女高中生嘅偶像，再加上早前佢亦拍攝過日劇《水着少年2》，知名度大增嘅佢拍住伊東，實行搶番唔少少女生意。
至於身為日本高絲化妝品LUMINOUS代言人嘅長谷川京子亦唔弱，喺新一輯廣告中京子大玩分身，化身為甜美可愛嘅「日妝」京子，以及性感野性嘅「晚妝」京子，佢重食正呢期嘅「功夫」熱潮，一邊打功夫一邊搽唇膏，夠晒創意。