謝霆鋒、蔡卓妍、陳柏霖、梁洛施（Isabella）、Boy'Z同范冰冰等，噚日喺北京出席電影《情天大聖》煞科記者會。
霆鋒着中山裝上陣，問到佢細妹婷婷近日同房祖名傳緋聞，霆鋒話除非親眼見到，否則佢唔會信，霆鋒又讚祖名係好男仔，重話如果係真嘅，婷婷就真係執到嘞。
不過提到婷婷早排同施念慈前夫陳鴻業拖手夜蒲時，霆鋒話：「呢個係文化觀念唔同，我唔係話西方文化啱，我都好傳統，但冇開聲話佢，任由佢俾傳媒追住影，有咁盡影咁盡，有咁衰影咁衰，個妹𠵱家俾人嘅感覺，係喺感情上好open。」
而Isabella就同曾傳緋聞嘅陳柏霖同台，但佢哋全程冇傾過偈。Isabella話早排去咗上海拍洗頭水廣告，令佢把秀髮元氣大傷，認真倒米！
周杰倫之前同台灣新力唱片對簿公堂，大家互相指摘，本來周杰倫搵咗華納唱片幫佢出張演唱會實況唱片，但就因為單官司，新力禁制周杰倫推出呢張碟，而其他唱片公司亦唔想捲入官司，所以按兵不動。不過噚日終於有消息話，周杰倫同新力嘅官司解決咗，華納亦會喺呢個月中推出呢張碟。
官恩娜同吳日言噚日去到美孚出席Roadshow記者會，吳日言將會頂替官恩娜做手機鈴聲榜嘅主持。師姐官恩娜大讚吳日言聰明伶俐，絕對可以勝任。吳日言就話平時見到自己啲歌登上鈴聲榜時，都會好開心。
林青霞做咗少奶奶後，生活都唔知幾咁悠閒，噚日佢同一位朋友喺君悅酒店歎下午茶。甚少曝光嘅林美人雖則年屆五十，但依然冇走樣，真係難得！而咁啱喺嗰度飲茶嘅重有王菲同經理人陳家瑛，又有張學友同楊受成，楊受成走時重好有紳士風度，主動幫青霞同王菲埋單㖭！
性感女星安雅、王敏德同尹子維等人合作拍攝電影《PTU女警─偶然陷阱》。
安雅喺戲入面飾演卧底，除咗有唔少打鬥同動作場面外，佢又不時以性感造型示人，酥胸半露，以此誘大賊出現。
苗僑偉噚日應邀到香港理工大學出席高爾夫球邀請賽記者會，現場個個都叫佢做苗大俠，佢唔單止即場示範打高爾夫，重過兩招畀其他人㖭！阿苗話：「身邊朋友都幫手賑災，華人高爾夫球會都籌到超過一百萬，會捐去大球場嘅賑災活動，我都捐咗一萬蚊，小小心意，仔女都有份。」
