新年天氣急凍，氣溫降到七至九度，左丁山俾啲冷風一吹，又試領嘢，喉嚨一痕，咳嗽隨至，於是立即去睇醫生。醫生翻查十年病歷，話左丁山年年都有此病，照食去年嘅舊藥可也。返到公司，大編輯上嚟送書，叫左丁山參考吓，呢本新書叫做《破譯紫微疾病宮》，作者呂可風。市面上關於紫微斗數嘅書非常之多，呢本新書有乜看頭？大編輯話：「你當查字典可也。先登入http://www.kankanwoo.com，打入出生年月日時，電腦就會排出你嘅命盤，詳列命宮、疾病宮等等。嗱，拎住份命盤，搵出疾病宮內之星宿，如紫微獨坐子午宮之類，跟住就按圖索驥睇吓有乜嘢疾病。」
左丁山識啲唔識啲，叫大編輯舉個實例。大編輯索性同左丁山搵流年，搵到流年疾厄宮係「七殺武曲」雙星坐酉宮，然後「查字典」，根據本書目錄，翻到第一百三十五頁：武曲七殺坐卯酉宮，內文云：「武曲七殺俱為陰金，金性十分強烈，金主肺，為肺臟生理系統的疾病，包括肺癆、咳血、呼吸系統等疾病。」
嘩，好彩，左丁山冇肺癆咳血，只係年年睇醫生都係食止咳藥、喉嚨消炎藥，應該都係屬於呼吸系統毛病，呢本書冇講錯吖，十分準繩㖭。於是問大編輯點解要出版呢本書，大編輯話：「我哋出版一啲如沙士新聞分析、世貿組織問題等等正路書，唉，每本賣得百零，蝕到喊。但之前出過一啲紫微斗數書，起碼可以賣到一至三版，我諗住現在人人關心健康，睇紫微未必過份着重財運、事業運，反而疾病重緊要，於是咪說服呂可風寫一本紫微斗數反映嘅疾病形態，等大家知多啲，知所避忌、防範！」