由善心人以六萬三蚊「義買」賑災嘅印尼大龍躉，噚日朝由海鮮店東主吳先生（中）喺西貢佛堂門海面放生，重獲自由嘅大龍躉，尾巴一揚就潛咗入深海不知去向。而為咗避免條龍躉再被網獲，海鮮店職員就喺龍躉尾巴綁上紅繩結作識認，希望其他漁民「網開一面」。
吳生又話，連日來仍然收到好多熱心市民查詢義賣，不過龍躉已有買家，佢就呼籲有心人向相關慈善機構捐輸。
有份「放生」嘅海鮮店職員「耀哥」好感慨咁話，南亞大海嘯當日，佢同漁民喺印尼海面撈獲條大龍躉，之後海面就波濤翻滾，漁民話好唔尋常，即時加速將漁船駛走。當佢哋將漁船駛到最近嘅島嶼，就傳來海嘯嘅消息，佢話好彩走得快，所以對條龍躉特別有感情，希望佢（龍躉）返回海洋後自己執生啦！區民傑攝
傳真︰2623-9278
電郵︰