無綫後日喺紅館舉行嘅《2004年度十大勁歌金曲頒獎典禮》，司儀已經落實咗由鄭丹瑞、何韻詩同鄭中基擔任，咁到時無論係劉浩龍、楊千嬅定係Twins攞獎，都有緋聞情人同台演出嘅畫面睇吓，包保唔會悶！
不過，最矚目嘅當然係最受歡迎男女歌手花落誰家，無綫重特登公布網上投票三強，男歌手係劉德華、李克勤同古巨基。華仔都好多年冇攞過最受歡迎男歌手，所以今年志在必得；而基仔就未攞過，如果佢真係得獎，對新一輩歌手嚟講都幾振奮。而女歌手就係陳慧琳、楊千嬅同容祖兒。新人獎就暫時由周國賢、梁洛施同薛凱琪領先。
而噚日李克勤接受《香港直播》訪問，佢話聽日會同譚詠麟去大馬做「左麟右李演唱會」，第二日先趕返香港出席頒獎禮。對於許志安話喺所有頒獎禮完結後，會約晒所有歌手食飯，克勤話：「好，我叫埋華仔囉，不過叫齊人好難，有啲人公司自己慶功，唔易成事。」
另外，新浪網最近喺網上設立「我的十大，全民十大」投票，本報噚日接到投訴話每當有票數接近或超越古巨基時，就突然俾人刪咗幾百票。
新浪網發言人噚日喺電話度話：「其實我哋好公平，因為有電腦程式監察，當發現有人造票，電腦即刻會自動取消嗰啲票數。直至𠵱家為止，首三位係古巨基、李克勤同劉德華。」
鄭希怡（Yumiko）日前喺上海出席「第十一屆Channel[V]全球華語音樂榜中榜」記者會，雖然冇獲提名，但佢下星期一晚仍然會做表演嘉賓。Yumiko話將拍攝關錦鵬執導嘅電影《長恨歌》，並且飾演鄭秀文（Sammi）嘅情敵，Yumiko聽聞Sammi搵咗老師學講充滿上海味嘅國語，所以佢自己亦唔敢怠慢。
台灣藝人張清芳前晚同高盛證券亞洲副董事長宋學仁喺灣仔君悅補擺喜酒，新郎宋學仁同前妻所生嘅囡囡宋寧都有嚟，佢同張清芳嘅關係情同姊妹，宋寧之前重同「新媽咪」張清芳去紐約揀婚紗，兩母女感情融洽。
婚後張清芳會同老公住喺淺水灣嘅豪宅，實行「夫唱婦隨」咁話！
台灣黎光文化公司負責人胡明威，舊年請曾友正撰寫《超屌得周杰倫—就愛這樣的JAY》，並委託朝日文化公司販賣。周杰倫同阿爾發認為此舉有侵犯周杰倫肖像同私隱之嫌，所以入稟向胡明威等人索償二百五十萬港元。經台灣法院審理，法官認為本書唔係以商業交易為目的，周杰倫嘅私隱冇受損害，故判敗訴。
譚小環噚日喺九龍塘拍《皆大歡喜》，劇情講述馬浚偉被鍾嘉欣拒愛，所以去咗南美發展，認識咗小環，佢哋重到談婚論嫁嘅地步，但最後因為馬仔忘記唔到鍾嘉欣，所以呢段情就結束。噚日着住婚紗拍攝嘅小環話：「呢件婚紗好重，好似就跌咁，唔知係咪我冇肉托唔起。」
