最近旺角AV舖嘅戰場，已經逐漸由西洋菜街，打到落去朗豪坊！當中LCDTV同Plasma呢兩大超薄電視類，可算係近年最多人想買嘅AV產品，如果有買機經驗者，都知𢱑極爛腳，大不了都係平到一千幾百，或者送你一個掛牆架咁大把。《蘋果》就搵嚟幾款超筍優惠畀讀者，包括32"LCDTV送市值七千蚊嘅20"LCDTV、買Plasma送埋DVD錄影機等，想買定機喺農曆新年招呼朋友？今日就咪走雞喇！
記者：朱崇德
攝影：陳盛臣
ImageGirl：Irene
今日介紹嘅特價精選，最大特色係全部LCDTV同Plasma，都係呢期至Hit、至多人搵嘅Items，而且大家重係以行貨價錢（當然包埋原裝保養啦），可以得到最盡嘅送機優惠；不過大家緊記以下特別優惠，只限《蘋果》讀者專享，買機時記得攞埋今日嘅報紙落去呀！
SONY最巨32"LCDTV機王（KLV-L32MRX1）$31,800
KLV-L32MRX1可以話呢期最多人搵LCDTV機王之一！搭載有WEGAEngine視像引擎，最大特色係將輸入訊號全面數碼化處理，將雜訊減至最低，並全面提高畫面的解像度，展現更鮮明、更清晰及更自然的影像質素！至於其他硬件，都是行使現時最高階的規格，例如解析度達WXGA的1,280×768（16:9），光亮度亦有450cd/m2、可視角度有170o等。
不過機身最搶眼之處，都係佢個懸浮式屏幕設計，簡單講就係屏幕四邊，以透明玻璃團團圍着，在漆黑的環境下觀賞此機，能令畫面有如「懸浮」於半空之上嘅效果！還包括重低音輸出及中置揚聲器輸入等，更吸引係全日本製造，相對普遍韓國、中國或東南亞製品，講質素講穩定當然更有保證啦！
《蘋果》優惠：送20"LCDTV
呢部PHILIPS20"LCDTV（20PF8846），街價做緊成七千蚊，係剛落場冇耐嘅新機，最強之處是內置數碼梳型濾波器，可將色濃度及明亮度資訊分開單獨處理，令影像更清晰銳利，減少失真！解析度640×480、光亮度450cd/m2、對比度350:1，最強是可視角度達176o。其他功能包括CrystalClearIII畫質改善、FM收音及ActiveControlPlus自調亮度功能，不過筆者最喜歡係內置麗音同虛擬環迴音效喇叭，機身厚度又只有87mm，擺喺睡房就最啱。
中價抵玩32"LCDTV（KLV-L32M1）$25,880
SONYKLV-L32M1可以話係LCDWEGA液晶電視嘅上代機王；好多人都會將佢同樓上嘅KLV-L32MRX1混淆。如果齋睇Config，KLV-L32M1同樣擁有32"顯示屏（16:9）、WEGAEngine、450cd/m2光亮度、170o可視角度等特色；唯一不同者，是顯示屏解析度，KLV-L32M1使用了更高數值的WXGA1,366×768（16:9），令影像輸出能力更上一層樓，加上機身加入嶄新「流線孤形」機身設計，放在家居每一角，都能散發出有如室內擺設的魅力！
以行內人角度已覺抵買，加埋下面提及嘅送機着數，更係吸引力大增！此機原產地為東南亞，如果你係追「日」一族，首選當然係上面嘅KLV-L32MRX1啦！如果想用中價位入貨，KLV-L32M1質素都已經係高過市面好多牌子機，一句到尾，中價抵玩！
《蘋果》優惠：送17"LCDTV＋DVD機
呢個送機套餐第一部係CMVGT-701N嘅17"LCDTV，解析度達1,280×768，對比度亦達500:1、光亮度有300cd/m2，對應D-Sub，駁電視及電腦都冇問題。另外再送SONYDVP-F35P，只有63mm闊，可作垂直擺放；對應逐行掃描，及全讀DVD-Video、DVD±R/RWVCD、MP3等碟種。
42"超闊屏夠立體（42PF-9966）$37,990
電視主要可以分日本機同歐洲機，如果唔喜歡日本機顏色過豔、影像過利，PHILIPS呢部42PF-9966可算係歐洲機中至柔和影像嘅Plasma代表！42"超闊大顯示屏，賣價$37,990已經相當吸引；平心而論，筆者在全個訪問拍攝過程中，都係以呢部42PF-9966最能給予筆者驚喜；正常嚟講，愈大嘅畫面，愈會令致影像「鬆散」，但42PF-9966所見的情況就完全冇問題，原因除了是使用了1,024×768的高解像顯示、3,000:1的對比度及1,000cd/m2的高光亮度外，更重要是加入了PHILIPS專利的PixelPlus2數碼技術，透過全新「像素倍增技術」，增加輸入訊號的掃描及像素，從而全面提升影像的質素！不過更令人喜愛的，是內置DigitalCrystalClear，令每個輸入訊號的色彩及亮度倍增，使影像自然逼真之餘，亦可更富立體感，是其他牌子中好難給予到嘅感覺！
如果以行內人評價此機，以呢個價位買到42"Plasma，又要有咁好畫質，佢真係贏成條街，如果喜歡睇碟者，此機是首選！不過要求高者，仍然覺得用佢嚟睇電視節目，就有點不足。
《蘋果》優惠：送韓產DVD+/-錄影機
跟機送嘅呢部LGDR4922W，最強賣點係同時對應DVD±R/RW燒錄制式，唔使驚買錯碟錄唔到戲啦！內置畫中畫、麗音及G-Code，睇戲錄電視夠簡單。設有SD/MMC/MS、DV、S-Video等輸入插口，玩數碼影像或翻錄DV都得，最啱鍾情玩影片剪輯嘅用家。
最平入門27"LCDTV（LC-27M6S）$8,880
PRIMALC-27M6S可以話係現時低價LCDTV中最多人揀嘅機種；以$8,880機價，玩到上27"LCDTV，真係現時最低價位，雖然係國產Panel，但質素都相當唔錯，一樣有1,280×720 嘅解析度，對比度為600:1、光亮度為550cd/m2、支援1080i/720p/480p，以畫質實淨程度，絕對唔會比一般韓產機比下去！此機最強是內置電視雙調諧器，所以可以對應到雙畫面、畫中畫、畫外畫及九格畫面等輸出，絕對啱晒三心兩意成日轉台之人！除色差、Tuner、S-Video等電視、DVD影像製式輸入外，佢重玩埋DVI及VGA等電腦制式輸入，一機多用。
《蘋果》優惠：送高解像DVD錄影機
GIECGK3108可以話同LC-27M6S係最匹配組合，首先佢可以對應HVD，用家可以輕易玩上1080i及720p等高清影像，不過最驚喜之處，係佢喺播放一般DVD碟片時，都能夠將影像谷上1080i的高清影像！如果你問筆者，市面上重有冇其他DVD機有相類功能，我諗真係要上到去天龍或馬蘭仕一類中、高檔次機先玩到。
數碼坊（23882713）
地址：旺角亞皆老街8號朗豪坊地庫2層25號