唔好話香港社會分化，為咗領匯上市都有中產階級與公屋部份住戶之爭，一到有真正大事發生，香港人不分老幼、不分貧富、不分政治派別，就會齊齊走出嚟，以行動證明香港人愛心爆棚，關懷世界。
「小公關」一向都有做義工，曾為華東水災、台灣地震等事件籌款而奔跑，今次發生海嘯，死亡人數以十萬計，小公關以及佢嘅朋友，義不容辭，一聽見紅十字會急call，立即放棄假期節目，跑去紅十字會做義工，負責聽電話、發收據、去地鐵站呼籲捐款。據小公關講：「香港人真係好令我感動，假期做得比返工更辛苦，好值得。紅十字會每日收到幾大包郵袋，裏面都係捐款支票，連日來我去旺角、荃灣、奧海城等地方當更，見到無論行動唔方便嘅阿婆、揸住十元八塊碎銀嘅學童，都好有耐心咁排隊捐款，錢箱好快就滿晒。我真係感動到喊。我哋香港人充滿愛心，為善絕不後人，好值得我哋驕傲，喺其他義工度聽番嚟，其他志願組織籌款亦非常成功！」
香港人係好好心嘅，除咗出錢，重有好多人出力，去咗災區做義工㖭。不過如《信報》社評（一月三日）話齋，救災係專業人士所為，我哋出完錢之外，最好由番國際救援組織負責救援工作，由啲國家去搞番，因為凡係涉及國與國之事，都係政治，我哋欲救無從。例如《國際先驅論壇》報（一月三日）頭版報道，印度一個海港城市Nagappattinam，有二千人死亡，劫後餘生難民居於一個作結婚用嘅禮堂之內，但係官僚不見蹤影，街上擺滿救援食品，但冇人分派，於街上牛隻就猛咁𡁻食物，禮堂內難民就捱飢抵餓！印度話唔需要美國或任何其他國家嘅幫忙，自己可以應付。可惜物資就堆積用唔到，欠缺組織力呢！