童子軍就日行一善，董團夥就日行一蠢，海嘯救人癡呆化、賑災做騷玩手指，最新一鑊，就係聲稱中國國民黨重量級人物兼台北市長馬英九發表過反分裂法言論，拒發簽證，又再出醜一次！
所謂反分裂法，連美國政府都公開反，咁董團夥敢唔敢驅逐美國駐港領事、兼拒絕任何美國官員入境？梗係畀個天佢都唔敢喇！馬九哥咁英偉瀟灑嘅政壇豆腐俊男，點解遭到董團夥欺善怕惡？可能係因為台灣暫時未有核彈囉！
係咪正如好多人推測，亦好有可能係廢董上次慘遭馬九哥搶奪風頭，有大量少女師奶，見到馬九哥就尖叫歡呼，見到廢董就掩鼻搵路走，激發起廢董妒火中燒？
之不過冇理由吖！側聞團夥內好多單身或有老公女高官，對馬小九亦一片情深咁暗戀，廢董打壓馬小九，情有可原，咁成班女Fan屎，點解唔向廢董聯手簽署抗議？
或者真係有難言之隱，廢董對馬小九冇心病，反而覺得大家都係俊男，識英雄重英雄，只不過北京嘅壽爺溫寶當局，眼見馬九哥唔聽佢哋支笛，惱羞成怒，落柯打叫廢董整招絆馬索，等馬小九半途墮馬出洋相！
點知，喺呢個有正義感嘅世界，邊個係忠，邊個係奸，邊個英俊，邊個醜八怪，個個係有眼睇嘅！廢董蠢行，無論有冇胡溫指使，都係自暴其醜，俾人睇到好似一班類似維園阿伯嘅小丑，向木村拓哉掟泥沙。
（圖）馬英九
傳真︰2623-9278
電郵︰