海嘯危機慢慢淡化，西九龍問題解決無期，連煲呔都要將西九龍問題公開化，唔再堅持單一投標！
地產禍港，經過紅灣半島及西九龍，早已天怒人怨，咁中區警署嗰一嚿又點？西九龍醞釀文化公投，但中區警署，特區政府就想側側膊博大霧！可能係因為細細單，兼冇牽涉成千億咁多，就諗住可以胡混過骨喎！
旅遊事務署宣布，喺本月二十二號起，連續三個周末及周日，開放中區警署，並舉辦所謂「導賞團」，俾市民親身入去睇過之後，再提出意見，睇吓保唔保留，以後至決定招標！
睇個樣就好似好民主！不過咪住，望真啲就知有唔妥！原來所開放嘅，唔係成間中區警署，俾市民睇全相，而係露少少，只係睇個報案室，警署裏面有歷史價值部份如羈留囚室，同埋監獄嘅下倉，就拒絕開放！
另外，每位入場人士，限定半粒鐘匆匆「參觀」，重諸多刁難，例如要預先申請入場券，手續多多，即是叫啲市民唔好去咁解！
黃霑追思會、海嘯賑災，喺大球場舉行，市民自由出入，幾時有話要攞入場券？旅遊署毫無誠意，目的就係求其應付搪塞，搞到冇乜人去參觀，跟住宣布：鑑於市民對中區警署嘅反應冷淡，故此都係拆卸重建，用嚟起樓好過！
全港市民大團結，聲討紅灣半島醜聞，建築商先至肯低頭！紅灣啲居屋都毋須拆，中區警署咁有價值嘅戰前百年古迹，又點可以拆？中區警署搞假開放、假諮詢、假透明，半遮半掩，開啲唔開啲，最有價值嘅域多利監獄部份，藉口結構不安全唔畀參觀，即時不但三點不露，連背脊都冇得睇，只係得個膊頭，咁點樣評點身材？
紅灣半島醜聞，市民大獲全勝，西九龍問題，煲呔亦要讓步，旅遊署何德何能，敢違抗民意？笑話！保中區警署，捍衞域多利監獄，挽救古迹，抵制地產商暴利，人人有責，應該拆為平地嘅，係呢個無能嘅廢柴政府！
傳真︰2623-9278
電郵︰