立法會有六十個議員咁多，但每個全體會議淨係可以畀兩個議員提辯論，所以每次都要靠抽籤解決，睇吓邊兩個議員手風順、抽得中。但總有啲議員好黑仔，次次抽籤都抽唔中，所以立法會都好公平，如果邊個議員連續五次食白果，到第六次就唔使抽籤，直接畀佢提動議。
連續五次抽唔到籤嘅涂謹申，噚日終於可以直接提動議唔使抽籤，佢打算喺十九號嘅會議，辯論「資訊自由法」。八方話，呢個題目好僻喎！阿涂講，無辦法啦，佢之前想講嘅，全部都俾人講晒，輪到佢嘅時候又唔知講乜，所以就揀呢個其實都好重要嘅題目，正式係有檔期可惜冇好戲。
原來阿涂之前入咗五張籤，包括紅灣半島、西九同埋政改等。紅灣結果搞掂咗冇爭議，西九同政改就俾梁家傑同大班搶咗閘。原本佢有意講賑災，李永達就叫佢唔好，因為佢今日要提休會辯論，結果就搞到佢惟有講「資訊自由法」。
傳真︰2623-9278
電郵︰